आदित्य नारायणलाई हिरो बनाउँदै निकिताको निर्देशक बन्ने तयारी |

     

         कुनै समयमा चर्चित चलचित्र निर्माण गरेर लोकप्रिय बनेको गोपिकृष्ण मुभिज पछिल्ला केही चलचित्रको असफलताले खस्किएको छ । तर, गोपिकृष्णले आफ्नो पुरानो साखलाई अगाडि बढाउन स्तरिय चलचित्र निर्माण गर्न थालेको देखिन्छ । निर्देशक निरक पौडेलले चलचित्र ‘होमवर्क’मा खुबै मिहिनेत गरेका छन् । यस्तै, ‘ठमेल डट कम’ नामक चलचित्रको कथावस्तु पनि राम्रो रहेको वुझिन्छ । अब, गोपिकृष्ण मुभिजकी अध्यक्ष समेत रहेकी निकिता पौडेल चलचित्र निर्देशनमा हात हाल्ने तयारीमा लागेकी छिन् । निकिताले निर्देशन गर्न लागेको नयाँ चलचित्रको हाल धमाधम कथा लेख्ने काम भैरहेको छ । श्रोतका अनुसार निकिताले आफ्नो पहिलो चलचित्रमा चर्चित गायक उदितनारायण झाका छोरा आदित्यनारायण झालाई नायक बनाउने तयारी गरेकी छिन् । हुनत, अहिलेसम्म आदित्यले चलचित्रमा काम गर्ने वा नगर्ने पक्का भैसकेको छैन । आदित्यको व्यस्तताले गर्दा पनि उनले कहिले समय दिन्छन् भन्ने पक्का भएको छैन । केही बलिउड चलचित्रमा काम गरेपनि आदित्यले सफलता हात पार्न सकेनन् ।
        आफ्नो डेब्यू निर्देशन रहने चलचित्रमा आदित्यलाई काम गराउँदा यसले निकितालाई पनि फाइदा पुग्नेछ । के आदित्यले नेपाली चलचित्रमा नायकको रुपमा डेब्यू गर्लान् ? प्रतिक्षा सबैलाई हुनेछ ।