१७ वैशाख, काठमाडौं । ‘पहाडमा जाडो बढे तराईले सेक्नुपर्छ, आँधी आओस् तराईमा पहाडले छेक्नुपर्छ’ भन्ने सत्यराज आचार्यको स्वरमा सुसज्जित गीतजस्तै यतिबेला पहाडका भूकम्प पीडितलाई सहयोग गर्न तराई मधेसले हात बढाएको छ ।
बिहीबार मात्रै मोरङका उद्योगी-व्यवसायीको टोली करिब २५ सय मेट्रिक टन खाद्य सामाग्री बोकेर काभ्रेपलान्चोकतर्फ लागेको मोरङ उद्योग संगठनका अध्यक्ष शिवशंकर अग्रवालले अनलाइनखबरलार्इ जानकारी दिए ।
‘काभ्रेपलाञ्चोकका एक हजार परिवारलार्इ पुग्ने सम्पूर्ण खाद्य सामाग्री पठाएका छाैं” अग्रवालले भने । संगठनले काठमाडाैंबाट ३० वटा बसमा भूकम्प पिडितलार्इ निशुल्क बिराटनगरसम्म लगेको थियो ।
खाद्यान्न उत्पादनका दृष्टिले पहाड भन्दा तराई मधेस सम्वृद्ध छ । नेपालका अधिकांश खाद्य उद्योगहरु तराईमा छन् । पहाडमा जाने चाहमल लगायतका खाद्य सामाग्रीको स्रोत पनि तराई नै हो ।
बिराटनगरमा चामल, चिउरा, बिष्कुट, चाउचाउ, पीठोलगायत उत्पादन गर्ने डेढ सय बढी उद्योगहरु सञ्चालनमा छन् । महाविपत्तिमा खाद्यान्नको संकट नहोस् भनेरै आफूहरुले खाद्यान्न उद्योग बन्द नगरी सञ्चालन गरिरहेको गोल्छा अर्गनाइजेसनका उपाध्यक्ष दिवाकर गोल्छाले अनलाइनखबरलाई बताए ।
काठमाडौंका केही व्यवसायीहरु गोदाम बन्द गरेर बेपत्ता भएपछि काठमाडौंका धेरै पसलहरु बन्द छन् । यसले गर्दा भूकम्पपीडित क्षेत्रमा खाद्य संकट हुन सक्ने त्रास फैलिएको छ । तर, मुलुकभर खाद्यान्न संकट हुन नदिन आफूहरु प्रतिवद्ध रहेको गोल्छाले बताए ।
अहिले तराईका उद्योगहरुले पहाडमा सहजै खाद्यान्न आपूर्ति गर्नुपर्ने राष्ट्रिय आवश्यकता बनेको छ । नेपालका ९५ प्रतिशत उद्योगहरु तराईमै छन् । अन्य पहाडी जिल्लामा महाभूकम्पले केही असर गरे पनि अधिकांश तराईको अवस्था यतिबेला सामान्य नै छ ।
दुगड ग्रुप पनि सक्रिय
भूकम्पले प्रभावित पहाडी जिल्लाहरुमा खाद्यान्नको संकट हुन थालेपछि तराईबाट सहयोग जुट्ने क्रम सुरु भएको छ । दुगड समूहले धादिङ, दोलखा र ललितपुरको लेलेलगायतका ठाउँहरुमा त्रिपाल, विष्कुट, औषधि, चाउचाउ, दाल, चामल लगायतका खाद्यान्न सामाग्री वितरण गरिरहेको छ ।
केएल दुगड समुहका प्रवन्ध निर्देशक कुमुद दुगडले कालोबजार रोक्न सरकार र उद्योगी व्यवसायी दुबै पक्ष चनाखो हुनुपर्ने बताएका छन् । दुगडले वीरगञ्ज र नेपालगञ्जमा खाद्य उद्योग सञ्चालन गरिरहेका छन् ।
‘खाद्य संकट हुन नदिने सरकारी कमिटीमा म पनि सदस्य छु, कालोबजारी हुन नदिन सरकार र व्यवसायी सक्रिय हुनुपर्ने मैले सुझाव दिएको छु’ उनले भने- ‘मैले आफ्ना उद्योगहरु सञ्चालन गरिरहेको छु ।’
खाद्य संकट र कालोबजारी हुन नदिन आफ्नो गोदाम खोलिएको उनले बताए । ‘खाद्य सामाग्रीको अभाव छैन, हामीसँग पर्याप्त स्टक छ, हामी खाद्य संकट हुन दिँदैनौं ।’ दुगडले भने ।
रुपन्देही र नवलपरासीका उद्योग सुचारु
अनलाइनखबर सहकर्मी सलमान खानका अनुसार खाद्य वस्तुको अभाव हुन नदिन रुपन्देहीका उद्योगीहरुलाई आ-आफ्नो उद्योगहरु सञ्चालन गर्न उद्योग वाणिज्य संघले आग्रह गरेको छ ।
संघका अध्यक्ष रामकुमार शर्माले रुपन्देहीमा चामल उत्पादन गर्ने उद्योगीहरुले भारतबाट समेत चामल आयत गर्ने भएकाले मुलुकमा चामलको अभाव नहुने बताए ।
भूकम्पले उद्योगमा क्षति नपुगेका कारण आफूले उद्योग सञ्चालन गरिरहेको रुपन्देहीे करैहिया ३ सिद्धार्थ राइस मिल प्रालिका सञ्चालक चन्द्रमान श्रेष्ठले जानकारी दिए ।
त्यस्तै टिकुलीगढ ५ मा रहेको चौधरी फुड प्रोडक्टका सञ्चालक शन्तकुमार चौधरीले आफ्नो उद्योगको वस्तु (दालमोठ) उत्पादन गर्ने क्षमता दैनिक १५ क्विन्टल रहे पनि खराब मौसमका कारण दैनिक करिब ७ क्विन्टल मात्र उत्पादन भइरहेको बताए । तर, भूकम्पले पहाड क्षेत्रका उद्योगहरुको उत्पादन बन्द रहे पनि आफूहरुले सोको आपूर्ति गर्न सक्ने चौधरीले बताए ।
रुपन्देहीमा मात्रै खाद्य वस्तुमा आधारित (चाउचाउ, विस्कुटलगायत उत्पादन गर्ने) ४ सय ११ उद्योग छन् । त्यस्तै, चामल, चिउरालगायत उत्पादन गर्ने ९ सय ७७ उद्योग छन् ।
त्यसैगरी, नवलपरासीमा रहेको विनोद चौधरीको उद्योग पनि सञ्चालनमै छ । चौधरी समूहले भूकम्प पीडितलाई पाँच लाख प्याकेट चाउचाउ राहत दिएको छ ।
निजी क्षेत्रका दुई ठूला छाता संगठन नेपाल उद्योग वाणिज्य महासंघ र नेपाल चेम्बर अफ कमर्सले मंगलबार नै सबै उद्योगी व्यवसायीलाई आ-आफ्ना उद्योग सञ्चालन गर्न संयुक्तरुपमा आग्रह गरेका थिए । महासंघले भूकम्प पीडितलाई १० करोड रुपैयाँ राहतको घोषणा नै गरिसकेको छ ।
तर, यस्तो विपत्तिको घडीमा उपभोक्तालाई सहज आपूर्ति गर्नुको साटो कतिपय व्यापारीहरुले कृत्रिम अभाव सिर्जना गरी महंगोमा बिक्री गरिरहेका छन् । त्यस्ता व्यवसायीहरुलाई प्रहरीले पक्राउ गरिरहेको छ ।
No comments:
Post a Comment
कस्तो लग्यो त ?? प्रतिक्रिया दिनुहोस् !